Feierowend – Buchprojet
136, rue de l'Alzette; L-4010 Esch-sur-Alzette, Gemenderotsall (1. stack)
Feieren. Danz, Musek a Fester am Minett ass e Buch iwwert d’ Danzmusek-Kultur am industrielle Süde vu Lëtzebuerg an de Joren 1920-1980. Et ass geschriwwe vum Laura Steil, Anthropologin & Historikerin op der Universitéit vu Lëtzebuerg (C2DH), an Zesummenaarbecht mat FerroForum asbl a mam Luciano Pagliarini, Museker an Historiker.
D’ Fräizäitkultur ass en Thema, dat manner dokumentéiert an erfuerscht ginn ass, dat eis awer e wichtegen Abléck an déi méi breed Gesellschaft ka ginn. D’ Buch fänkt u mat den éischte Café-Dancings an den 1920 Joren, an erzielt d’Entwécklung vun enger Feier-Kultur, déi déif mam Aarbechtermilieu verbonne war. D’ Recherchen hunn an engem Aarbechter-Quartier ugefaangen: op der Grenz zu Esch/Uelzecht. Vis-à-vis vun der Schmelz Terres Rouges, huet do e wichtegen, festlechen Deel vum Aarbechterliewen stattfonnt, deen a Kontrast stoung mat der schwéierer Aarbecht, mee awer och a Kontinuitéit mat hir war. Et ass och keen Zoufall, dat déi reegelméisseg Baler an den 1980er Jore lues a lues verschwonne sinn, zesumme mat de Schmelzen.
D’ Buch baséiert sech op Archiven an op Gespréicher mat Leit, déi d’Danzmusek-Kultur mat erlieft a mat opgebaut hunn. Am Buch fënnt een Dokumenter, Fotoen a Temoignagen, déi nach ni publizéiert goufen, sou wéi Texter vum Laura Steil a vum Luciano Pagliarini.
Den 20. November 2024 kënn Der an der Escher Gemeng méi iwwert dëse Buchprojet gewuer ginn. Der kënnt och en Tierchen danzen! De Luciano Pagliarini a säin Orchester spillen déi bescht Danzmusek! An zum Schluss offréiert d’ Stad Esch e Pättchen.
Reservatioun: Escher Bibbs T: 2754-2210
